ശബരിമല വിഷയത്തിൽ സന്ദീപിനോട് പറയാനുള്ളത്

ശബരിമലയിൽ യുവതികൾക്ക് നിയന്ത്രണം എന്തുകൊണ്ട് എന്ന് ഒരു സന്ന്യാസി എന്ന് സ്വയം വിളിക്കുന്ന ആളിനു വിവരിച്ച് കൊടുക്കേണ്ടി  വരുന്നത് മഹാകഷ്ടമാണ്, എങ്കിലും  പറയാം .

ബ്രഹ്മവാദിയായിരുന്ന വിവേകാനന്ദ സ്വാമികൾ സ്വന്തം ഗുരുവിനെ ആദ്യമായി കണ്ടപ്പോൾ ചോദിച്ചത്, "താങ്കൾ ഈശ്വരനെ കണ്ടിട്ടുണ്ടോ?" എന്നാണ്.


ആ ചോദ്യത്തിന് , "നിന്നെ കാണുന്ന അത്ര വ്യക്തതയില്‍ ഞാന്‍ ഈശ്വരനെയും കാണുന്നു" എന്ന് അസന്നിഗ്ധമായി മറുപടി പറഞ്ഞുകൊണ്ടാണ്  വെറുമൊരു പൂജാരിയായിരുന്ന  അദ്ദേഹത്തിന്റെ ഗുരു ശ്രീരാമകൃഷ്ണദേവൻ നരേന്ദ്രനെ വരവേറ്റത്. രാമകൃഷ്ണദേവനെ താങ്കൾ അംഗീകരിക്കും എന്ന് പ്രതീക്ഷിക്കുന്നു.


ശ്രീരാമകൃഷ്ണ വചനാമൃതത്തിലെ ഒരു ഭാഗമാണ് ഈ കൊടുത്തിരിക്കുന്നത് . സന്ന്യാസിയുടെ കഠിന നിയമങ്ങളെ പറ്റി പറയുന്ന ഒരു ഭാഗം





താങ്കളുടെ വ്യക്തിജീവിതത്തെ പറ്റിയല്ല ,  അയ്യപ്പനെ പറ്റിയാണ് പറഞ്ഞ് വരുന്നത്.


സകലതും ഉപേക്ഷിച്ച്, കാനനത്തിനു നടുവിൽ യോഗാവസ്ഥയിൽ കഴിയുന്ന സന്ന്യാസി തുല്ല്യനായ അയ്യപ്പനെന്ന സങ്കൽപ്പത്തെ പറ്റി താങ്കൾ വിശ്വസിച്ചാലും ഇല്ലെങ്കിലും,

ആ സങ്കൽപത്തിനു പിന്നിലെ താൽപര്യം എന്താണെന്ന് മനസ്സിലായിക്കാണും എന്ന് പ്രതീക്ഷിക്കുന്നു.

ഇക്കാര്യം  ഒരു സന്ന്യാസിയോട് വിവരിക്കേണ്ടി വരുന്നത്, ഒരു ഹൈന്ദവൻ എന്ന നിലയിൽ എനിക്ക് അപമാനമാണ്. പക്ഷേ ഇന്നത്  ചെയ്യാതെ വയ്യ.


ഒരു പക്ഷേ, ഇപ്പോഴും  താങ്കൾക്ക് അത് മനസ്സിലായിക്കാണണം എന്നില്ല.


അത് മനസ്സിലാവണമെങ്കിൽ താങ്കൾ മണിമാളികളിൽ ദക്ഷിണവാങ്ങി നടത്തപ്പെടുന്ന ബ്രഹ്മജ്ഞാന ട്യൂഷൻ ക്ലാസ്സുകളിൽ നിന്നും , ടൂർപാക്കേജുകളിൽ നിന്നുമൊക്കെ  മാറി,  സാധാരണക്കാരിലേക്ക് ഇറങ്ങിച്ചെല്ലണം,

എന്നിട്ട്, സ്വന്തം ഉപദേശം കൊണ്ട് ഒരു മുഴുക്കുടിയനായ ഒരു  സാധാരണക്കാരനെ വെറും 41 ദിവസത്തേക്ക് മദ്യപാനത്തിൽ നിന്ന് സ്വന്തം ഉപദേശം കൊണ്ട് അകറ്റി നിർത്താൻ ശ്രമിക്കണം.

അപ്പോൾ മാത്രമേ കാട്ടിനുള്ളിൽ തപസ്സിരിക്കുന്ന ആ യോഗിയുടെ തപസ്സിന്റെ ശക്തിയുടെ ആഴം താങ്കൾക്ക് മനസ്സിലാകൂ...


ഒരു മണ്ഡലമാസക്കാലത്തേക്കേങ്കിലും സമാധാനത്തിൽ തന്റെ കുടുമ്പം പുലരുന്നത് കാണുന്ന  അനേക ലക്ഷം സാധാരണക്കാരായ സ്തീകളുടെ മനസ്സ്നിറഞ്ഞ പ്രാർത്ഥനയും കൂടിചേർന്നതാണ് ആ തപശ്ചക്തി.


താങ്കളെ പോലുള്ള ലക്ഷം പേരോ, അധികാരത്തിന്റെ ദന്തഗോപുരത്തിലിരുന്ന് ആജ്ഞകളുടെ വാറോലകൾ കൊടുത്തയക്കുന്നവരോ വിചാരിച്ചാൽ ഒരു ജനതയെകൊണ്ട് കുറച്ചു നാളത്തേക്ക് ത്യാഗോജ്ജ്വലമായ ജീവിതം നയിപ്പിക്കാൻ പറ്റില്ല. പക്ഷേ, അയ്യപ്പനെന്ന ആ ശക്തിക്ക്  അത് പറ്റും.


അതുകൊണ്ടാണ്,

ബ്രഹ്മജ്ഞാനം എല്ലിന്റെ ഇടയിൽ കയറിയ താങ്കളേ പോലുള്ളവരും ,
ഹിരണ്യകശിപുവിന്റെ പ്രേതം ആവേശിച്ച മഹാരാജാവും,
അദ്ദേഹത്തിന്റെ സൈന്യവും,  സർവ്വാധികാരങ്ങളും  എല്ലാം കൂടി  മുക്രയിട്ട് ശ്രമിച്ചിട്ടും ഒരു യുവതിയെ പോലും അവിടെ കയറ്റാൻ പറ്റാതിരുന്നത്.

കാരണം , ഇന്നത്  കേവലം ആചാര ലംഘനത്തിന്റെ മാത്രം  പ്രശ്നമല്ല, അനേകലക്ഷങ്ങൾക്ക് ഒരു താങ്ങായി പ്രവർത്തിച്ചിരുന്ന സാധാരണവിശ്വാസികളുടെ  ആത്മാഭിമാനത്തിനുമേലുള്ള അധിനിവേശം കൂടിയാണ്.


( ഈ വിഷയത്തെ അങ്ങിനെ ആക്കിതീർത്തത് ഒരു ഭരണാധികാരിയുടെ വകതിരിവില്ലായ്മയാണോ അതോ, അയ്യപ്പന്റെ തന്നെ ലീലാവിലാസമാണോ എന്നത് മറ്റൊരു വിഷയം . )



പറഞ്ഞ് വന്നത്,

വലിയൊരു വിഭാഗം ജനങ്ങളുടെ നന്മ കണക്കാക്കി രൂപകൽപ്പന ചെയ്യപ്പെട്ടിട്ടുള്ള ഇത്തരം  കാര്യങ്ങളിലൊക്കെ  മാറ്റങ്ങൾ കൊണ്ടൂവരേണ്ടത്, നിന്നിടത്ത് നിന്ന് അവരെ കൈപിടിച്ചുയർത്തിക്കൊണ്ടാവണം എന്നാണ്.

അതുചെയ്യാൻ തപസ്സു വേണം ( പണിയെടുക്കണം! ) എന്നാണ്.


അതു ചെയ്യാൻ മുന്നിട്ട് ഇറങ്ങുന്നവർ ത്യാഗോജ്ജ്വലമായ ജീവിതം നയിക്കണം എന്നാണ്.


ഭരണഘടനയും നിയമവും കലക്കിക്കുടിച്ച ജസ്റ്റിസ് ഇന്ദു മൽഹോത്രക്കും ജസ്റ്റിസ് കുര്യൻ ജോസഫിനും  മനസ്സിലാവാത്ത ഒരു  കാര്യം ഇവിടുത്തെ സാധാരണക്കാരെ പറഞ്ഞ് മനസ്സിലാക്കുക  എന്ന ധീരമായ കൃത്യം ഏറ്റെടുത്തിട്ടാണ് താങ്കൾ താങ്കളുടെ ആത്മാർത്ഥതയും‌‌ സാധനാശക്തിയും തെളിയിക്കേണ്ടത് .


അല്ലാതെ ഒരു ജനാധിപത്യ രാഷ്ട്രത്തിലെ ജനങ്ങളുടെ പ്രതിഷേധത്തെ ഉരുക്കുമുഷ്ടികൊണ്ട് നേരിടുന്ന അധികാരദുഷ്പ്രഭുത്ത്വത്തിന് ഓശാന പാടിക്കൊണ്ടാകരുത് .



സംഘപരിവാർ വിരോധത്തെ പറ്റി


ഒരിക്കൽ കൈരളിചാനലിൽ ഇരുന്ന് താങ്കൾ പറയുന്നത് കേട്ടു[1], "പൗരോഹിത്യത്തിന്റെ നെറികേടുകൾക്ക് കുടപിടിച്ചുകൊടുക്കലാണ് സംഘപരിവാറിന്റെ ജോലി" എന്ന്.

എന്നാൽ ഒരു കാര്യം ചോദിച്ചോട്ടേ,

താങ്കൾക്ക് താങ്കളുടെ ഗുരുവായ ചിന്മയാനന്ദ സ്വാമികളെ പറ്റി അറിയാമോ ? സംഘപരിവാർ സംഘടനയായ വിശ്വഹിന്ദു പരിഷത്തിന്റെ സ്ഥാപകാചാര്യൻമാരിൽ[2] ഒരാളായ ചിന്മയാനന്ദസ്വാമികളെ പറ്റി ?
ചിന്മായന്ദ സ്വാമികളുടെ ഗുരുവിന്റെ മറ്റൊരു ശിഷ്യനായ ശ്രീ സത്യാനന്ദ സരസ്വതി സാമികളെ പറ്റി അറിയാമോ? നിലക്കൽ സമരത്തിന്റെ ആധ്യാത്മിക ഊർജ്ജസ്രോതസ്സായി പ്രവർത്തിച്ച സത്യാനന്ദ സരസ്വതി സ്വാമികളെ പറ്റി ? സമയം കിട്ടുമ്പോൾ ഒന്ന് അന്വേഷിക്കുന്നത് നല്ലതാണ്  അവരൊക്കെ എന്തിനുവേണ്ടിയാണ് പ്രവർത്തിച്ചത് എന്നും  അറിഞ്ഞിരിക്കുന്നത് നല്ലതാണ് .

താങ്കൾ, ഇവിടെ ആഡംഭര റിസോർട്ട് നടത്തിയും, ടൂർ നടത്തിയും, എലൈറ്റ് ക്ലാസീനു ആധ്യാത്മിക ക്ലാസ്സുകൾ നടത്തിയും ജീവിക്കുമ്പോൾ, 46 വർഷങ്ങൾക്ക് മുന്പേ‌ തന്നെ, ജാതി-മതഭേദമന്ന്യേ അബ്രാഹ്മണരെ തന്ത്രവിദ്യയും പൂജയും പഠിപ്പിക്കാൻ അഹോരാത്രം യത്നിച്ച RSS പ്രചാരകനായ മാധവ് ജി യെ താങ്കൾക്ക് അറിയാമോ ?

ക്ഷേത്രത്തിൽ പൂജ നടത്താൻ നമ്പൂതിരിയേതര സമുദായത്തിൽ നിന്നുള്ളവർക്കും അവകാശമുണ്ട് എന്ന പ്രഖ്യാപനം നടന്ന പാലിയം വിളംബരത്തെ പറ്റിയും അതിനു പിന്നിൽ പ്രവർത്തിച്ച മാധവ് ജി യെ പറ്റിയും താങ്കൾക്ക് അറിയാമോ ?

തന്ത്രവിദ്യാപീഠത്തിൽ പഠിച്ചിറങ്ങുന്നവർക്ക് സമൂഹത്തിൽ സ്വീകാര്യത ലഭിക്കാൻ, കാഞ്ചി മഠാധിപതിയെ വരുത്തി വിദ്യാർത്ഥികൾക്ക് സാക്ഷിപത്രം വിതരണം ചെയ്ത സംഘടന[3] ഏതാണെന്ന് താങ്കൾക്ക് അറിയാമോ ?

കുറച്ചു നാൾ മുന്ന്,  താങ്കളും താങ്കളെ പിന്തുണക്കുന്ന രാഷ്ട്രീയ സംഘടനയും നവോദ്ധാന വിപ്ലവമായി കൊണ്ടാടിയ ഒരു സംഭവം ഉണ്ടായിരുന്നല്ലോ, ദേവസ്വം ബോർഡിലെ  ആദ്യത്തെ ദളിത് പൂജാരി നിയമനം; ഈ ദളിതരെ  പൂജപഠിപ്പിക്കാൻ ആരാണ് മുന്നിട്ട് ഇറങ്ങിയതെന്ന് അറിയാമോ ?

അതിനു വേണ്ടി ആളും അർത്ഥവും നൽകിയത് ആരാണെന്ന് അറിയാമോ ? ദേവസ്വം ബോർഡിലെ ജാതിബ്രാഹ്മണനല്ലാത്ത ആദ്യ ശാന്തിക്ക്, സുപ്രീം കോടതിയിൽ വരെ പോയി കേസ്സ് നടത്താൻ ഒപ്പമുണ്ടായിരുന്ന സംഘടന ഏതായിരുന്നു എന്ന് ഒന്ന് പോയി ചോദിക്കുക.

വിശ്വഹിന്ദ് പരിഷത്ത് നടത്തുന്ന ഏതെങ്കിലും ക്ഷേത്രത്തിൽ ജാതി നോക്കിയാണോ ശാന്തിമാരെ നിയമിക്കുന്നതെന്ന് ഒന്നു പോയി അന്വേഷിച്ച് വരിക.

ഇന്ന് ഈ നാട്ടിലെ സാംസ്കാരിക മണ്ഡലത്തിൽ ഏറ്റവും എളുപ്പമുള്ളതും സേഫ് ആയതുമായ വഴി ഇടതുവശം ചേർന്ന് നടക്കുക എന്നതാണെന്ന് എല്ലാവർക്കും അറിയാം.
ഇടതിന്റെ കുടക്കീഴിൽ അഭയം തേടിയില്ലെങ്കിൽ മൂത്രമൊഴിക്കുന്നത് പോലും സൂക്ഷിച്ചു വേണം എന്നതാണവസ്ഥ. ഹിന്ദു ആണെങ്കിൽ പിന്നെ പറയുകയും‌ വേണ്ട.
അങ്ങനെ ഒരു സാഹചര്യത്തിൽ , ഹിന്ദു സന്ന്യാസി എന്ന ലേബലിൽ താങ്കൾക്ക് മാത്രം ഈ നാട്ടിൽ ഭക്തിക്കച്ചവടം ഇത്ര ഭംഗിയായി കൊണ്ട് നടക്കാൻ ആവുന്നു എന്നതും ,
താങ്കൾ ടൂർ കൊണ്ടൂപോയ ഒരുസംഘത്തിലെ ഒരാൾ അപകടത്തിൽ  മരിക്കുക കൂടി ചെയ്തിട്ടും അത് എന്തുകൊണ്ട് ചർച്ച ചെയ്യപ്പെടാതെ പോയി എന്നതും ഒരു സാധാരണക്കാരൻ എന്ന നിലയിൽ എന്ന് അത്ഭുതപ്പെടുത്തുന്ന കാര്യങ്ങളാണ്.

ഒരു ഐടി തൊഴിലാളിയായ എനിക്ക്, അഞ്ചുസെന്റ് ഭൂമിവാങ്ങി ഒരു വീട് വയ്ക്കുക എന്നത് ഒരു ദീർഘകാല സ്വപ്നമായിക്കൊണ്ടിരിക്കുന്ന ഈ കാലത്ത്,
താങ്കളെ പോലെ ഒരാൾക്ക് എങ്ങനെ ഈ അത്യാഡംഭര റിസോർട്ടുകൾ ഈ ചുരുങ്ങിയ കാലം കൊണ്ട് ഉണ്ടാക്കാൻ പറ്റി എന്നതും എന്നെ അത്ഭുതപ്പെടുത്തുന്ന കാര്യമാണ്.

പറഞ്ഞ് വന്നത്, താങ്കൾ താങ്കളുടെ ബിസിനസ്സ് അഭംഗുരം തുടരുക. പക്ഷേ കളവിൽ ചതി കാണിക്കരുത്.

എലൈറ്റ് ക്ലാസ്സിനു ടൂർത്ഥാടനം[4] നടത്തി ഉപജീവനം കഴിക്കുന്ന താങ്കൾ, RSS നെ പൗരോഹിത്യത്തിന്റെ വക്തക്കളായി മുദ്രകുത്താൻ വരരുത് . അവരെ നവോത്ഥാനം പഠിപ്പിക്കാൻ ചെല്ലരുത്.

ഒരു അഭിസാരിക ആവുന്നതിൽ യാതൊരു തെറ്റുമില്ല. 

പക്ഷേ, ചാരിത്ര്യപ്രസംഗം നടത്തുന്ന അഭിസാരികയാവുന്നത് തീർത്തും അരോചകമാണ്

ഒരു പരിധിവിട്ടാൽ ആ ചാരിത്ര്യപ്രസംഗം പ്രകോപനപരവും ആണ്.



1. https://en.wikipedia.org/wiki/Vishva_Hindu_Parishad
2. https://www.facebook.com/yukthivaadi/videos/988815091315761/?t=259
3. https://youtu.be/fUVuzYjZlhU?t=402
4. കടപ്പാട്: വിശ്വപ്രഭ

Comments

Popular posts from this blog

Creating a bootable windows USB from Linux

Calibrating PIC microcontroller internal oscillator